علق كابتن إكرامي الشحات، وحش إفريقيا وحارس الأهلي الأسبق، على ارتداء رمضان صبحي قميص نادي بيراميدز، قائلًا :” حسيت بحاجة وحشة فى قلبى عند رؤية رمضان صبحي بقميص بيراميدز”.
وأوضح إكرامي خلال حواره مع الإعلامي معتز الدمرداش ببرنامج “90 دقيقة” المذاع على شاشة “المحور”، “حسيت بحاجة وحشة في قلبي، ولو كان رمضان قالي على الموضوع ده قبل ما يتفق مع الناس ويوقع كنت قولتله متمشيش من الأهلي، لأني دايما بميل للون الأحمر وحبي للنادي الأهلي فوق كل شيء”.
وأشار إلى أنه تحدث مع مدير أعمال رمضان، مضيفًا: “قالي أنه جايله عروض من إيطاليا وتركيا، حتى أنا رفضت وقولتله بلاش تركيا، وفى نفس الوقت العرض الإيطالي مكنش قوي، فتم رفض العرضين، وكان في عرض في أمريكا لكن محصلش نصيب فيه.. وهزعل لو رمضان جاب جون في الأهلي وأنا مش هخليه لا هو ولا شريف يلعبوا ماتش الأهلي”.
وتابع: “الأهلي بيكسب برمضان ومن غير رمضان وقبله كسب بالخطيب ومن غير الخطيب وبصالح سليم ومن غيره، الأهلي مش بيقف على حد ودي مش جملة بتتقال كدة وخلاص دي كلمة حقيقية وأحد أهم خصائص النادي الأهلي، ومفيش لاعيب يبقى رحيله خسارة على الأهلي”.
من حق الجماهير تزعل وأنا مباركتلوش لحد دلوقتي، وهو هيطلع يوضح أسباب انتقاله لبيراميدز في الوقت المناسب، رمضان مش صغير في السن هو بيفكر وعارف بيعمل إيه”.
وواصل: “شريف إكرامي مكنش بيلعب في النادي الأهلي، لكن هل عشان شريف مبيلعبش يقوم رمضان كمان ميلعبش؟ مستحيل طبعا وفي معطيات كتير غايبة عن الناس، لأن الناس بتحكم على الظاهر وعلى الخبر اللي بتقرأه، واستحالة شريف أو رمضان يلعبوا في الزمالك”.
وكشف: “مرتضى منصور اتصل بيا بعد أزمة شريف الأخيرة مع النادي الأهلي وقالي باب نادي الزمالك مفتوح لشريف إكرامي في أي وقت، لكن كان صعب يلعب في الزمالك، زي بالظبط مكنش ينفع حازم إمام يلعب لنادي غير الزمالك، مش من حق الأهلاوية أنهم يلوموا رمضان لكن من حقهم يزعلوا ده أمر مشروع”.
موضوعات متعلقة